Ministri britanik inkurajon Kosovën e Serbinë për dialog konstruktiv

17:21 | 14 Janar 2025
E.G

Ministri i Mbretërisë së Bashkuar për Evropë, Stephen Doughty i ka bërë thirrje Kosovës dhe Serbisë që të angazhohen në dialog.

“Ne angazhohemi për së afërmi me partnerët tanë në Kosovë dhe në të vërtetë anë e mbanë rajonit dhe vazhdojmë t’i bëjmë thirrje Kosovës dhe Serbisë që të angazhohen në mënyrë konstruktive në dialogun e lehtësuar nga BE-ja”, ka thënë ai.

Ai ka theksuar se trupat britanike të KFOR-it luajnë rol kyç në ruajtjen e një mjedisi të sigurt në Kosovë.

Doughty u pyet në Parlamentin britanik për progresit e marrëveshjes së sigurisë që Kosova ka nënshkruar me Mbretërinë e Bashkuar.

Doughty ka thënë se Mbretëria e Bashkuar ka përgjegjësi dhe marrëdhënie historike me Kosovën.

“KFOR-i jep kontribut thelbësor për të siguruar mjedis të sigurt në Kosovë dhe sigurisht trupat e Mbretërisë së Bashkuar luajnë një rol kyç në të”, ka thënë ai para deputetëve britanikë.